濠江雨露均沾 香江斯人憔悴

又派錢，人人七千蚊！大家係咪以為聽錯呢？港府派錢六千蚊，派到拖拖拉拉，甩甩漏漏，市民收到錢都還神啦，仲敢奢望加碼？實情係澳門又派錢至真！

澳門雖則靠博彩業支撐，但勝在腳踏實地，結果發展神速，財源滾滾來，而且賺到錢仲識得同澳門居民分享成果添。嗱，澳門特首崔世安發表任內第三份施政報告，宣布向每名永久居民派錢七千蚊，非永久居民亦獲派四千二百蚊，合資格人士嘅中央儲蓄戶口注資六千蚊，可謂人人有份，永不落空！

施政報告又提出多項紓困措施。大家聽住咯喎：每名居民獲發五百蚊醫療券，長者有六千蚊敬老金，打工仔減稅四分一，出租社屋全年免租，專上學生獲發二千蚊津貼，中小學生及幼兒學生分別可獲每人千七蚊及千五蚊津貼，年滿十五歲居民每人亦可獲得最多五千蚊進修資助……嘩，大禮應接不暇，澳門居民真係接到手軟，笑到合唔埋口！

澳門幾經風浪，由昔日氹仔變成今日濠江，政通人和，百業興旺，香港人看在眼裏，真係百感交集。話時話，澳門憑一個博彩業，就可以帶動旅遊、消費同娛樂等行業，回歸後經歷翻天覆地嘅變化。特首更加一屆比一屆好，崔世安一做當家，即刻大手筆還富於民，為澳門盛景錦上添花。

相比之下，香港就黯然失色咯，光芒一日黯淡過一日，香港特首就更加一蟹不如一蟹。年年增長嘅唔係經濟實力，而係隨時一觸即爆嘅民怨；歲歲上升嘅唔係市民嘅人工，而係象徵貧富懸殊嚴重嘅堅尼系數。同樣係特區，點解港澳發展有如此天淵之別？其實，計太一叮話齋，呢啲都好正常嘅，大家試諗諗，港府咁無能，香港人又點會有運行吖？叮！

就以派錢為例吖，澳門已經係第N次，次次派得又爽手，又順暢，澳人樂也融融。反觀港府做慣孤寒財主，難得一次向民意低頭派錢，竟然派到亂七八糟，搞到天怒人怨，你話幾咁窩囊！仲有，澳門推出紓困措施大刀闊斧，而香港老人家要求加少少生果金，港產官僚都左推右卸，斤斤計較，一味諗住將啲錢留畀自己加薪增福利。有咁樣嘅官老爺，港人想有好日子過，難過中六合彩啦！

咁啦，特首選舉又嚟嘞，北京次次買大開細揀錯人，今次唔該落注準啲，唔好又塞個膿包畀港人嘞。如果唔係，香港人個個爭住移民澳門，香港遲早變孤島o架咋，叮！