政壇：新人上位白鴿醞釀內鬥

區議會選舉之後，白鴿黨就陷入內憂外患困局，黨內大佬如高達、單仲楷出咗局，反而黨內十一個80後白鴿仔贏到區選，尋日佢哋同傳媒見面，候任區議員（利東二）羅健熙認為，下年黨應該要畀班年輕人試吓參加立法會選舉或者超級區議會，似乎有踢開阻路老將之意。白鴿主席鐵頭仁睇怕要煩黨內會唔會釀新一波內鬥，除此之外，佢參選特首亦可能因為公文袋過橋抽板，分分鐘唔夠提名票。

白鴿黨班新進對未來各有諗法，有人認為，佢哋全港知名度唔夠黨內星級前輩高，貿然參選超級區議會不利，但亦有人認為黨應該畀班年輕人試吓明年參加立法會選舉，甚至單獨開一條隊畀青年軍參選，睇吓可唔可以殺出一條血路。過去白鴿幾度分裂，都同啲青年冇位上有關，今次又點呢﹖

內憂之外，鐵頭仁其實仲煩緊外患。區選之後，白鴿黨同公文袋關係愈趨微妙，地區合作同特首選舉都咪話冇分歧，當年公文袋黨魁袋巾傑落場選特首，白鴿黨全力支持，今屆袋巾傑卻話公文袋冇興趣參與呢啲冇意義嘅小圈子選舉，唔知叫唔叫食碗面、反碗底呢﹖