政壇：CY拚選委唐唐玩自嘲

「備選」疑似特首候選人梁振英（CY）尋日報名參選特首選舉委員會政協界別選委，一方面落場選，同時又做選民，有冇問題呢？CY話，競選選委同有份投票選特首係兩件事，兩者並冇衝突，總之希望當選嘅選委踴躍投票，選出一位好特首。就連宣布退選嘅全國人大常委范徐麗泰都話，CY身為全國政協常委，的確有權參加選委選舉，況且外國啲總統候選人都投票畀自己啦，所以冇問題嘅。

至於另一位疑似特首候選人唐唐，尋晚就去咗香港管理專業協會周年晚宴，佢演說時一邊自嘲、一邊分享對領導能力嘅睇法。佢話身為領導必須具備願景、執行、溝通同經驗，就算有願景都好，都唔能夠迷失視野，要做到將夢想轉化為現實，否則成為白日夢就真正如佢早前所講嘅「completely rubbish（完全是垃圾）」嘞。

對於怒炒公關關鄭麗敏（Heidi）魷魚，唐唐重申純粹合約結束啫，至於日後一旦決定參選，佢就會喺自己嘅競選辦公室，組隊負責同傳媒及社會溝通。另外，唐唐嘅商界朋友喺選委選舉中並冇自動當選，佢話依家評定局勢言之尚早喎。