政壇：林公公甩身蘇錦樑膺墊底局長

尋日港大民意研究計劃公布最新高官民望調查結果，顯示早排官場執位出現意想唔到嘅效果，簡單一句就係原本民望最低嘅墊底局長林公公搵到繼承人，新嘅插水王就係商務及經濟發展局局長蘇錦樑嘞，佢由今年七月接任局長、首次登榜到家吓，支持佢做局長嘅受訪市民從未超過百分之二十五，係冇人氣之最，民望同佢一樣咁低嘅譚志源、陳家強真係要多謝蘇錦樑墊底囉！

港大呢項調查由十月三十一號至本月九號舉行，訪問咗逾一千個市民，結果發現，煲呔曾嘅表現繼續被評為表現失敗，而林公公就被評為表現一般。三司十二局官員中，共有四個問責局長被評為表現不彰，大部分官員嘅支持率都錄得二至五個百分點嘅跌幅，其中民政事務局局長曾德成跌幅最大，下跌咗五個百分點，若以團隊表現嚟睇，佢哋真係夠肉酸。

狂銷競爭法得罪商界

個別官員表現上，蘇錦樑繼續做包尾大幡，支持度本來就少得可憐嘅佢，今次再有支持者流失，支持佢做局長嘅受訪者少咗四個百分點，只得百分之二十二；至於啱啱喺九月升任政制及內地事務局局長嘅譚志源，表態支持嘅比率亦僅得百分之二十七，同樣較上次跌咗四個百分點，呢兩個由副局長升呢嘅官不約而同被評為表現不彰。

講開墊底局長，以前林公公做政制及內地事務局局長時，表現例牌落後眾人，亦係民望最差嘅局長之一，佢升呢之後，官場插水王即刻由蘇錦樑接班，睇怕同佢近日狂銷競爭法，不惜將法例剝牙有關，今次蘇錦樑不單討好唔到商界同中小企，仲輸埋民望，真係偷雞唔到蝕把米囉。