性罪起底多漏洞 歧視家長害兒童

世風日下，道德滑坡，衣冠禽獸用嚟形容時下鹹蟲色狼就最貼切嘞。皆因好多性罪犯都係衣冠楚楚，一表斯文，而且專向入世未深嘅學生同幼童埋手。為人師表嘅有，兒童社工又有，連羔羊醫生都有，全部都係披着羊皮嘅色狼。

點樣防範色狼混入羊群呢？你知啦，孌童案同校園風化案愈嚟愈猖獗，偽裝成正人君子嘅癡漢搞到好似年中無休嘅便利店咁，梗有一個喺左近，家長真係提心吊膽o架。

好嘞，社會防狼之聲此起彼落，港府左度右計，橫諗豎諗，終於願意接納法改會建議，由下月一日起落實性罪行定罪紀錄查核機制。若然工種涉及接觸兒童或智障人士，僱主可以要求查看準僱員嘅性罪行紀錄，自行決定係咪聘用有案底人士。

嗱，對性罪犯起底，太一叮舉手贊成o架。美國早就適度公開性罪犯資料，法國等歐洲國家更會對孌童犯施以「化學閹割」，用藥物令淫狼色慾大減，以防再犯案。歐美治淫狼用重典，無他嘅，事關對淫狼仁慈，等如對市民殘忍吖嘛。

講番香港，點解太一叮兜咗咁大個圈呢？事關港府呢套性罪行起底機制只係得半桶水，防範淫狼軟弱無力，變相對市民繼續殘忍。首先，查核機制非強制性質，萬一某位校長一時偷懶唔做，隨時引狼入室，學生以為老師經過篩選，更加信任，就更易出事。其次咯喎，機制涵蓋嘅性罪行定義狹窄，偷窺同露體等罪行竟然不計在內。喂，做得瞥伯同露械狂魔嘅心智都唔健全得去邊啦，咁咪即係將就快爆嘅計時炸彈放喺學生身邊，有冇咁荒謬啲呀？

更荒謬嘅係，起底機制現階段只限於社福機構及企業。即係話，家長請私人補習教師，繼續要以貌取人，如果遇上衣冠禽獸，咁就惟有自嘆唔好彩。有冇搞錯？咁嘅條例，係咪變相歧視家長？係咪等如鼓勵淫狼將魔爪轉為伸向補習學生？全港聘用私人補習嘅學生數以萬計，加上好多時單對單共處斗室，諗起都牙煙！

仲有一樣，現時潛藏羊群中嘅鹹蟲色狼聽咗會好開心，事關起底機制只適用於新僱員o架咋！唉，一個漏洞多多嘅性罪行起底機制，等如自我閹割，對打擊性罪行軟弱無力，咁做同姑息養奸冇乜分別o架咋，叮！