政壇：搞搞政：阿人敗選左賴右賴
喺區議會選舉中，職工盟立法會議員李卓人輸咗畀工聯會小花劉桂容，仲畀工聯會會長鄭耀棠諷刺，話小花突然遇到個巨無霸，點知原來「淺水可以浸死蛟龍」。
唔知阿人係咪唔忿氣又無處發洩，尋日出席港大一個講外傭居港權嘅學生論壇時擺工聯會上枱，話之前睇到篇文章寫到有個洗廁所工人同人講，因為工聯會反對外傭有居港權覺得好溫暖。佢睇到就覺得好心酸，因為香港嘅工人好冇安全感，又話作為工會唔應該搵啲最冇聲出嘅外傭去恰喎。之後仲話政府對外傭事件唔肯出聲，係為咗喺區議會選舉幫建制派咁話。原來除咗公文袋外，阿人都係姓賴嘅。
