政壇：政府被轟逼港交所搬竇

施政報告提到，政府總部西翼重建後嘅大樓，部分樓面將會用作港交所同證監會辦公室之用。「股壇長毛」David Webb尋日發炮，撰文炮轟政府冇理會到港交所作為一間上市公司，搬遷嘅決定應由董事局同股東自行決定，並非直接由政府指定。

上址擬以招標形式發展，Webb狠批政府喺出售發展權嘅同時，竟包括考慮向發展商「指定」項目嘅主要租戶，尤其港交所係一間私人機構，而非政府部門。

另外，政府修訂有關重建計劃，話會擴大公眾休憩用地面積，大幅減少商場規模。Webb批評呢個咪就係特首微觀管理嘅「典範」，政府要決定大樓需要幾多零售空間，點解唔畀自由市場決定點樣使用物業？

夏佳理明年四月就退任港交所主席，Webb最後仲貼現任港交所董事史美倫可能會接任。不過，有中環友就質疑，史美倫明年亦做咗港交所董事六年，按規定明年亦需退任，何解仍可做主席？