政壇：傳患重病肥龍變瘦龍

上禮拜六，記者遇到前政務司司長「肥龍」許仕仁同太太羅美美一齊坐車去灣仔世紀香港酒店嘅老上海飯店食晏。司機放低佢哋後，太太就入飯店先，肥龍就一支公行去對面馬路嘅便利店買嘢，喺便利店逗留咗五分鐘，拎住個白膠袋行出嚟。

當日天氣唔凍，周圍嘅人都着短袖衫，但肥龍就着西裝、白恤衫，仲要加件V領冷衫。見佢瘦咗成個碼，啲衫明顯有鬆位，雙下巴冇咗，仲瘦到成塊面都凹晒，「肥龍」變咗「瘦龍」。

佢之後返飯店同太太食飯，食咗一個鐘左右。佢出嚟時原本拎住嘅白膠袋入面就多咗個飯盒，唔知係唔係食唔晒要拎走。

據聞，一直支持唐唐選特首嘅肥龍最近已好少參與助選。早喺一個月前有政界人士更傳佢身患重病，又話佢通過波仔，上禮拜有傳佢拍賣愛駒「各適其適」，之後工商銀行又宣布佢以個人理由唔出任獨立非執董，睇嚟肥龍身體有問題嘅消息空穴來風，未必無因。