政壇：唐唐頻失威怒炒公關

疑似特首候選人前政務司司長唐唐同前行政會議召集人CY梁振英前日首次正面交鋒，尋日傳嚟勁爆消息，話唐唐忽然怒炒公關大員Heidi關鄭麗敏魷魚，堂而皇之嘅理由係Heidi兩個月合約已完。兩陣對壘，有人陣前易將肯定事有蹊蹺，江湖上流傳兩個原因。

CY先勝一仗高下立見

唐唐離開政府個半月嚟，醜聞、緋聞不絕，所提出嘅政策亦唔見得有平地一聲雷嘅效果，不過如果計呢個半月嚟最失誤嘅事件，就有「床照事件」同「港專事件」。

早前唐唐落荃灣探訪套房居民，堂堂大男人筆直咁攤喺人家張床上影相，立即被網民瘋傳為唐唐「床照」，惡毒啲嘅網民仲將佢放入棺材，咒佢「英年早逝」。到前日唐、梁初次喺CY做校董嘅香港專業進修學院碰頭，CY不經意咁問唐唐有冇去過港專，唐唐坦言冇，仲反問CY有冇去過，點知CY得意咁回應「呢度我搞嘅」。之後兩人大談房屋問題，有備而嚟嘅CY圖文並茂，用投影片詳解構思，唐唐則只靠一把口齋噏到尾，CY先勝一仗，高下立見。初時唐唐仲賴港專冇提出有投影設施可用，搞到港專要澄清其實有問過雙方，只有一方話會用投影設施。

此其一係Heidi失職，出現種種甩轆致唐唐形象一敗塗地，照咁睇佢怒炒Heidi不無道理。

其二，Heidi係前政務司司長「肥龍」許仕仁愛將，由佢坐鎮嘅亞聯政經顧問，老早接咗唔少政府項目嚟做，雖然佢哋○八年喺未經招標下，獨得為政府推銷醫療融資政策報告嘅合約，惹嚟益自己友之嫌後，少咗政府合約，但仍有唔少生意喺手，難專心服侍唐唐。亦有唐營中人分析，原來Heidi要拍住前老闆肥龍至有效果。據聞接手嘅會係立法會前秘書長馮載祥太太同傷殘人士體育協會主席馬潔嫻。

CY尋晚出席一個活動被問及唐唐換公關，係咪先贏一仗，佢笑不攏咀咁話唔會用贏輸嚟睇呢個問題，為佢做公關嘅人都係本住同一理念同熱誠去做嘅，都係本住為社會服務嘅心。