石蔭閘鎖頻頻壞 房署卸責懶懶閒

添馬艦新政府總部取名「門常開」，寓意聽取民意，福為民開。但係港府吹水唔抹嘴，懶理市民禍福，搞到葵涌石蔭邨班街坊飽受「門常關」困擾。

到底發生乜嘢事呢？原來，石蔭邨嘅單位閘鎖故障頻仍，搞到居民提心吊膽。以年逾八旬嘅阮老太為例吖，五月至今單位已經先後壞鎖四次，次次都開唔到門，變相慘遭「禁錮」。半年壞鎖四次，生活不便事小，一旦發生火警，逃生無門就大件事！

閘鎖失靈，火警逃生無門，諗起都牙煙，而更恐怖嘅係門常關危機幾乎遍布整條石蔭邨。資料顯示，房署由○九年六月至今年十月，共接獲六十一宗要求維修閘鎖個案，其中二十五宗更加需要換鎖，睇怕壞鎖都算係石蔭邨嘅最大特色咯！居民人心惶惶，擔心鐵閘無法開啟，唔少單位索性虛掩鐵閘就算，被迫長期「門常開」。

嗱嗱嗱，政府總部「門常開」變無掩雞籠，早已淪為盜賊樂園，依家石蔭邨居民門常開，正常人都知唔係長治久安之計啦，咁房屋署有乜反應呢？答案係：側側膊卸責。對於閘鎖頻頻故障，房署第一反應唔係諗計為居民解憂，而係搵藉口卸膊，反指閘鎖損壞同使用方法有關，一嘢將責任推番畀居民。

喂喂喂，居民用鎖匙開閘，又唔係賊佬用鐵筆撬門爆格，開門閂門咁簡單嘅動作，試問點樣可以整壞閘鎖？正如公屋聯會批評，石蔭邨三年收幾十宗閘鎖投訴，加上閘鎖整完又整、壞完又壞，好明顯就係閘鎖質素出咗問題，可能同房署以「價低者得」原則外判工程有關。房署唔全面換鎖，連全面檢查都懶得去做，漠視居民出入安全，唔通要搞出人命先至知驚？

俗語有話，泥水佬開門口，過得自己過得人。好心房署官僚快快妥善處理石蔭邨壞鎖危機啦，試問一句，如果閣下都係石蔭邨居民，終日擔驚受怕唔知幾時會變成甕中之鱉，甚至連發夢都驚會做密室燒豬，你哋仲會唔會咁懶懶閒？

講開又講，港產官僚敷衍塞責，得過且過，搞到公屋近年危機處處，何止閘鎖故障咁簡單。公屋升降機斷鋼纜事故就時有所聞，搞到居民搭𨋢驚餐飽，怕一落就直墮十八層地獄。仲有，白田邨驚現不尋常沉降，房署又係關人個關，懶理居民身處危牆之下，坐困愁城。

所以話啫，港府縮骨不為民，「門常開」名不副實，不如學似公屋鐵閘咁摺埋啦，免得市民提心吊膽吖嘛，叮！