政壇：搞搞政：撐建仔漏工聯林鄭顧此失彼
依家啲高官做嘢嘅方法有時真係嚇人一跳，好似發展局局長林鄭月娥尋日出席建仔搞嘅啟德方案展覽，喺致辭時突然話，上星期嘅區議會選舉令佢有感而發，話建仔幾個團體就啟德新區嘅發展做咗成年研究，單單佢親身同該黨開會已不下三、四次，因而「盛讚」佢哋取得地區支持係靠實力，話佢哋靠「蛇齋餅」當選，係矮化咗佢哋扎根社區嘅成果，又話：「我自己作為選民亦唔可以接受。」
唉！近日有批評指建仔靠「蛇齋餅」爭選票番嚟，林鄭使唔使急急撲出嚟幫腔兼撐到盡呀？講到過晒界，勢必招惹其他政黨爭風呷醋。事關啟德新區發展除咗建仔有做嘢，啱啱喺區選做咗票后嘅工聯會副會長陳婉嫻都不知做咗幾多嘢，但林鄭就隻字不提喎，似乎有啲顧此失彼喎，因住嫻姐日後循超級區議會議席入番立法會時，對佢秋後算帳呀！
設計圖片