政壇：葉劉寸高官離群

煲呔曾早年曾建議問責官員走入群眾，但過去幾年只聞其聲，未見認真落實，高官仍然脫離群眾施政，落區嘅次數寥寥可數，開放式嘅諮詢更加係絕無僅有，根本唔敢面對群眾。

建制派喺今屆區議會取得佳績，大家都關心佢哋日後同政府有乜良性互動，但多名建制派中人出席電台節目時，講到呢個話題時都好似心中有氣，好似身兼行政會議成員嘅建仔劉江華率先話，政黨政團喺社會政治方面都有佢位置，如果完全漠視佢哋嘅意見係唔可能嘅事，因此政府應該喺制訂政策出台前多聽意見，否則「出台撞板先收番係唔理想」；與此同時，佢又認為唔單止直選議員要聽最底層聲音，問責官員都應該咁做喎，言下之意係依家啲高官做得唔合格喇。

少落立法會 唔鍾意握手

劉江華暗批完班高官後，到前高官、新民黨主席葉劉淑儀接力。葉劉話自己之前同高官一齊去飲宴，已經發覺大家有唔同，因為啲高官食完幾道菜後，就會好似應份咁走咗去，相反佢哋就唔同，會坐好耐，而且當要走嗰時，會成張枱握過手先走，劉江華更加話佢會成場握完手先走添。葉太之後仲補充話，有啲高官好少落立法會，連握手都唔鍾意，有啲個性仲好深閨喎。

話時話，問責官員嘅主要職責就係同社會各界接觸溝通，走入群眾同大家傾偈握手等係指定動作，但依家班高官連握手都唔識，如非必要又唔同反對聲音打交道，要制訂以市民利益為依歸嘅政策，根本係天方夜譚，班高官如果仲係咁自以為是，遲早會激發更多民怨。