鹽水溝出豬骨湯 港人愈食愈心慌

天氣漸轉冷，打邊爐最啱。火鍋湯底葷素隨意，有辣有唔辣。不過好味道唔等於真材實料，一個唔好彩，叫個豬骨湯底，食落肚可能係完全冇豬成分嘅「朱義盛」湯底。

有食店員工踢爆，店內豬骨湯底係「溝」出嚟唔係「熬」出嚟嘅。湯底同豬一啲關係都冇，係廚房按公司「柯打」，用鹽、水加花奶溝成。無論食客原本選擇乜嘢湯底，加嘅都係呢種「自溝湯」，問你服未！

本報委託專業食品安全實驗室，對相關食店嘅「湯底」同另一間食店嘅豬骨湯底一齊做DNA測試。結果，前者湯底樣本根本搵唔到豬嘅基因，完全係「流嘢」，而後者嘅湯底就順利通過測試。

店方仲死撐，話湯底由豬骨同豬後腿肉熬製，可能有員工唔清楚製作過程產生誤會，仲話唔排除湯底經中央烹煮，送到分店後不斷加熱，滾得多連DNA都驗唔出喎。

咪噏得出就噏喇！浸會大學生物系專家話，呢次實驗嘅方法準確度同可信性都非常高，如果驗出唔含豬嘅DNA，相信湯底入面冇豬嘅成分。唔止專家咁講，本地著名大廚試味，一樣食得出豬骨湯底有蠱惑。

內地假冒偽劣食品防不勝防就聽得多嘞，早排湖南湘潭有市民買嘅「豬耳」食落一啲肉味都冇，攞去化驗，連正常豬肉纖維結構同脂肪顆粒都冇，懷疑用明膠同塑料製作。諗唔到家陣連香港亦淪陷，以假亂真博大霧，冇豬變有豬，仲做到成行成市添。

打開門做生意，最緊要童叟無欺，貨真價實，靠呃靠騙斂不義之財，遲早穿煲，自毀招牌。話時話，無良奸商以次充好，以假亂真，唔通「無王管」嘅咩？

弊在本港嘅食品安全監管漏洞多多，同內地有得揮。好似規管基因改造蔬果種植咁，雖然立咗法，居然仲有大量漏網之「果」。嗱，現時本地所種木瓜四成屬基因改造，因為毋須標籤，食咗落肚都唔知，有乜嘢後遺症更加唔知。當局話木瓜種植數量太多難以執法，乾脆就豁免，唔受條例規管，簡直係靠害。

雖然香港同內地「一國兩制」，講到問題食品，卻愈來愈似一國一制，內地有嘅，好快就會殺到本港；內地政府唔管，港府亦懶理。計太一叮話齋，如果當局繼續唔嗲唔吊，今日嘅內地就係明日嘅香港，叮！