CULTURE噏：用鏡頭活化廢墟

日本和台灣一股關注廢墟的熱潮，近年傳至香港。愈來愈多80後喜愛捐窿捐罅尋找香港廢墟的遺迹，當中有荒廢校舍、舊戲院、空置工廠……他們透過攝影和寫blog，訴說它們背後的有趣故事，讓更多人了解廢墟的昔日情懷。理工大學應用社會科學系社會政策研究中心主任鍾劍華認為，年輕人看着城市急速發展，舊有建築物逐一被清拆，別有一番感受。

這次我們找來三位鍾情廢墟攝影的80後青年，分享看法。

受訪者檔案

阿蛋

80後青年，讀多媒體設計，現從事遙控模型設計，愛寫blog分享。

Ken

80後龍友，鍾情菲林攝影，年半前廢墟開始成為他的攝影題材之一。

Bill

80後自由撰稿人，○三年起關注香港廢墟保育，常四出尋找荒廢建築。

Ken：我一直鍾意攝影，近年廢墟成為熱門攝影題材。香港有唔少荒廢校舍同工廠，背後有好多故事。我冇喺呢啲地方生活過，對我嚟講係一個「Unknown」，充滿神秘感。我發掘廢墟地點嘅主要方法，就係靠Google Map，由於大部分廢墟地點較為偏僻，交通唔方便，如果喺Google Map見到被樹遮住的建築群，好有機會係廢墟。

Bill：我住油塘，經常去鯉魚門影廢墟，影相之餘，透過同街坊或附近舖頭老闆傾偈，知道鯉魚門以前係採石場，亦做過日軍軍營，曾經係重要的經濟同歷史地。而廢墟攝影唔係純粹攝影咁簡單，最珍貴係可以了解當地以前嘅生活。

蛋：除咗影相，我仲會將所見所聞寫blog同大家分享。其實，廢墟與社會因素有關，例如點解香港有咁多廢校呢？因為十幾年前出生率低，令好多村校收生不足而面臨殺校。

鍾：近年社會轉變得快，令大眾對突然冒起嘅新事物漸漸吃不消，開始留意舊有建築物，透過了解呢類建築物，感受當時社會狀況。而喺科技同攝影器材普及下，年輕人鍾意運用自己嘅創意，以嶄新方式，為保留社會的集體回憶出一分力，亦表達佢哋對社會嘅歸屬感同關心。

Bill：城市化必定會淘汰舊建築物，香港發展得特別快，今日存在嘅嘢，聽日可能消失。我記得有朋友去過一個校舍廢墟，一個禮拜之後我再去，已經被夷為平地，所以如果唔想呢啲歷史消失，攝影係其中一個方法。

蛋：好多廢墟係香港人嘅集體回憶，我哋去過一間廢校，地下有社會、科學、健教嘅舊課本，呢啲科目依家已經冇晒，係我哋呢代人獨有嘅回憶。所以希望透過攝影同文字，令政府關注廢墟保育問題。以日本同台灣為例，好多廢墟已經改成歷史博物館同藝術中心。

鍾：年輕人能夠將自己嘅興趣同社會議題扣連，係一件值得鼓勵嘅事。近年被集體消費同科技主導嘅生活方式，容易令人忽視身邊嘅事物，而透過相片同文字，能再次喚起大眾重新審視廢墟嘅社會價值，相信可為社會帶嚟一啲轉變。

culture@on.cc