政壇：崇基校友憶坐火車返學
甲子歷來係大慶之年，中大崇基學院尋日喺灣仔會展舉行六十周年校慶晚宴，一千六百個崇基校友圍埋筵開一百三十圍，慶祝書院生日。晚宴籌委會主席係金融管理局總裁陳德霖(攞命陳)，消委會前後任總幹事陳黃穗同劉燕卿都有出席，劉燕卿仲同老公拍住拖一齊到添。
中大生幾乎個個都要搭火車、上高山，攞命陳話自己七六年喺社會系畢業，副修經濟。當年佢住北角，由於交通冇咁發達，火車一個鐘頭只得一班，返中大要花兩個鐘頭。陳黃穗就補充，當年嘅火車仲係用柴油，會噴黑煙，每次坐車由火炭入大學站，穿山窿時佢哋都要即刻閂晒啲窗，費事變花面貓。
一身雍容打扮的劉燕卿與老公拍拖到場。
陳德霖（右一）、中大校長沈祖堯（右三）及陳黃穗（左一）影大合照。