政壇：搞搞政：肥胡內蒙潑酒避乾杯

醫管局主席胡定旭早前去內蒙古考察，領略大草原風情之餘，都爆咗啲搞笑嘢，事關當地人招呼佢哋時，攞咗主人家珍藏嘅「雍正三號」巨形古碗，斟滿白酒請肥胡一次過乾，見到面盆咁大一碗酒，肥胡當堂唔敢接受挑戰，人急智生下，即刻效法當地人嘅禮數，點知將白酒潑到成身、成地都係，原來內蒙古人都唔係咁易做嘅！

蒙古族人豪情好客，佢哋抵埗後，除咗有着民族服飾嘅俊男美女跳舞外，眾人仲以細酒杯對飲乾杯，期間又用白酒向上向下酹酒，寓意「感謝天、感謝地」，之後再戴上一條絲質頸巾。所以，肥胡見到主人家敬咁大碗酒，咪又想敬天敬地囉，點知好多敬咗喺自己身上。主人家見到佢咁樣，等肥胡一飲完酒就即刻收番隻古碗，可能驚打爛啩！

內蒙行期間，一行人日日大啖羊肉、豪飲白酒，結果體重由一百八十五磅勁增十四磅，達至一百九十九磅嘅爆燈邊緣，肥胡返港後就進行地獄式減肥，先至令體重返到原點。