政壇：林建岳蝦碌

特首選舉委員會選舉呢啲小圈子遊戲，向來都係圍威喂協調名單參選，所以好多都自動當選，雖然係咁，但係人係鬼都要搞得認真啲、仔細啲，否則搞到甩轆，真係笑大人個口。話口未完，麗新發展主席林建岳就表演甩轆畀大家睇，佢日前組成嘅十五人娛樂圈參選名單中，竟爆出黎明退選事件，原因係佢未登記成為界別選民，所以無資格參選，要改由周星馳代替。放飛在即，至發現黎明原來仲吊吊fing，你話係咪夠晒詼諧！

林建岳同疑似特首候選人唐英年嘅關係千絲萬縷，回想唐唐做緊財政司司長嘅時候，林建岳曾經出動私人飛機載唐唐歐遊，可見兩人分屬老友。依家唐唐疑似選特首，林建岳就拉埋譚詠麟、黎明同黃百鳴等娛樂圈中人，約埋喺上星期三報名參選，似乎想打造星級選委名單。可惜當日唔見黎明現身，令各方疑團四起，究竟黎明因咩事唔蒲頭呢？

由周星馳補上

謎底終於喺尋日解開，原來黎明一直以來都冇登記成為選委會演藝界選民，所以冇資格參選之餘，連投票選選委都唔得。啱啱由紐約返港嘅黎明坦言，自己冇資格參選，佢話：「自己唔係選民，何來有資格做選委，可能中間出現美麗誤會！」被問到係咪唔想參與政治時，喺娛樂圈中外號「金句王」嘅黎明就話：「唔想因為黎明影響普羅大眾睇法！」既然黎明冇得選，總要有人取而代之，為咗維持呢張名單嘅星光熠熠指數，取代黎明嘅人竟然係周星馳，真係估佢唔到。