陳年舊例不修訂 私院搶錢不手軟

私家醫院近排事故爆完又爆，收費加完再加，好似要同公立醫院鬥醜怪咁款。但港府居然闊佬懶理，聽之任之。何解？原來當局早已「自宮」，變咗廢柴一碌。

講都冇人信，家陣監管私院嘅法例，居然四十五年嚟從未大幅修訂過，基本上原汁原味。陳年舊例對收費同盈利冇規管，私院話晒事，病人慘變羊牯任人宰割。

全港十三間私院，有十間屬於可豁免繳稅嘅慈善機構，佢哋掛住「慈善」招牌，除咗唔使畀稅，收費更加冇封頂。有醫院按照條例要求提供三等病床，可惜使用率長期偏低，因為床位收費係就係三等，但醫生睇症照樣按頭等收錢，一闊三大，條數有排計。與其話慈善，不如叫「搶錢」更貼切，叮！

仲有，「哎吔慈善機構」加價從來不甘後人。私院資金使用唔受監管，又冇條款限制巨額利潤，有間名義上非牟利嘅私院每年賺四億，財政儲備有幾十億，但加起價嚟絕不手軟。正如立法會議員話齋，單靠慈善團體條例監管私院已經不合時宜，現行制度失效，完全達唔到監管目的。

食物及衞生局局長周一嶽回應話，已經開始檢討條例，現時監管私院嘅政策已足夠。佢仲死撐，廉價床位供過於求，係因為大部分入住私院嘅病人都有醫療保險，毋須使用喎。

叮佢個鎯鎯！享受稅務豁免等等優惠，變相由公帑補貼嘅床位唔能夠物盡其用，醫療資源幾乎畀有錢人獨佔，監管名存實亡，周一鑊居然話「足夠」，真係不知所謂！

其實，正因為當局監管失職，放任自流，私家醫院收費先至愈來愈高，服務愈來愈差。前排浸會醫院發生初生嬰兒「呱呱墜地」嘅醫療事故，事後並冇及時通報。醜聞曝光，全港嘩然，周一鑊開頭居然話事故未達到嚴重級別，唔使通報喎。你話喇，咁嘅「監管」係咪笑話吖。

話時話嘞，周一鑊冇理由唔知私院有乜嘢問題，所謂監管已經足夠，不過係卸膊啫。呢，再過幾個月佢就夠鐘收工，到時將爛攤子留畀下屆政府，話之你咯！

好心周一鑊如果真係等收工，不如趁早自動消失好過，事關醫療系統千瘡百孔，佢一日做局長，病人一日冇運行，叮！