政壇：政商定格：郭樹清跣腳喻中央救市？
郭樹清尋日首次用中證監主席嘅身份公開亮相，出席國際金融論壇2011年全球年會，佢演講時先同觀眾道歉，因為轉咗工，原本想講國際貨幣金融體系改革嘅，最後改為講世界經濟再平衡。
喺佢咁多著作裏面，有關失衡同平衡嘅論述好多。不過佢就賣口乖，話講呢個題目係因為見到舊上司、現任社保基金理事長戴相龍好高興。以前戴相龍做人行行長嗰陣，佢有幸做過兩年助手……都唔關事嘅，反而係佢跣腳仆親，戴相龍反應最快，即刻上前扶佢。
呢個動作引起唔少網民回應，有人話有人扶一下就即刻企起身，莫非股市一救就反彈？最有聯想力嘅仲話，由戴相龍出手去扶，唔通預示社保基金會積極救市？
平衡術一向高超嘅郭樹清仆親，可謂老貓燒鬚。