政壇：搞搞政：工聯會特賣場掀謝票疑雲

首次獨立組隊參選區議會選舉嘅工聯會贏到開巷，最矚目係副會長陳婉嫻喺黃大仙龍上選區勝出，仲成為票后添，佢呢幾日四出謝票之餘，原來工聯會又喺聽日到月底分別喺屯門仁愛廣場同黃大仙龍騰墟舊址搞個特惠購物周，糧油雜貨等以低至六折出售，惹嚟益街坊謝票疑雲。工聯會理事長「吳揪得」吳秋北就話特惠購物周一向有搞開，絕對唔係謝票喎。

吳揪得話工聯會一直都熱心同市民一齊抗通脹，好似到各區街市格價，等市民知道邊度有平嘢執。不過，最近有傳聞話超市指使供應商控制零售商標價，咁擔唔擔心工聯會攞唔到平貨？佢希望超市體諒該會只係想方便市民抗通脹，可以高抬貴手，唔好咁霸道難為活動嘅供應商，等該會可以繼續賣平嘢益街坊喎。

話時話，幾年前黃大仙龍騰墟舉辦期間，已有附近商戶投訴被搶客，今次工聯會喺同一個地方再搞大平賣，唔知會唔會又有人投訴呢？