政壇：四叔拒評股樓神話歐債煩
受歐債危機影響，尋日港股急瀉千點。恒基地產主席「四叔」李兆基同長實執行董事「樓神」趙國雄尋晚出席福布斯（Forbes）頒獎禮晚宴時，被問到點睇後市，四叔就話「唔識睇」，對本地樓市亦只係話「一般咁啦」；而樓神就話歐債唔會波及本港樓市，因為大家仲有工開喎。
樓神以得獎人身份出席頒獎禮，對於港股大跌，佢話毫無疑問係受到歐債危機所累，但佢話希臘只佔歐洲經濟百分之二，已經咁麻煩，而意大利則佔歐洲經濟百分之八，一旦出事，後果可想而知。不過，佢相信今次經濟危機一定會雨過天青，但就要付出相當嘅代價，過程都可謂相當痛苦。
樓神話最緊要人人有工開，咁至係社會經濟穩定嘅關鍵。