放生愛滋肺癆犯 中港隨時一鑊熟

遼寧丹東有位十四歲愛滋男童，飽受歧視連書都冇得讀，村委惟有開間「一人小學」，請退休老師任教，呢種做法都算有人性咯。可惜，呢種咁有人性嘅做法喺神州大地簡直有如鳳毛麟角，可遇不可求。

東莞鳳崗鎮一名男子販毒當堂斷正，治安巡邏人員喺佢身上搵到幾克毒品。點知警員到場後竟大發慈悲，將疑犯放走，你知唔知乜嘢原因吖？

原來呢位毒販唔止有肺癆，仲染埋愛滋病，看守所同監獄都唔想收容，警方懶得依法辦事。其實，警方對佢屢擒屢縱，每次被拉，好快就放番出嚟，今次都唔知係第幾次咯。因為有愛滋兼肺癆呢塊「免死金牌」，毒販肆無忌憚，搞到當地毒品氾濫，通街道友。

派出所負責人解釋話喎，坐監都要身體好，爛手爛腳捉番嚟仲要墊錢幫佢醫病，自己當差十幾年，從未見過有愛滋病罪犯要坐監，即使當街打劫保安員，照樣放人。

叮！維持治安，保護居民生命財產安全，係警察最基本嘅職責，愛滋毒販為非作歹，警方居然變相做幫兇，仲有王法嘅？呢頭當局吹水「執政為民」，嗰頭警方就「執法為賊」，有冇荒謬啲呀！

再講，東莞鄰近香港，唔少港人喺當地消遣同生活，當局任由病壞罪犯周圍播毒，橫行無阻，唔止靠害當地居民，而且靠害港人添吖。話時話，愛滋病係不治之症，而肺癆菌更加無孔不入，傳染性超高，傳播速度又快，東莞當局咁搞法，禍及其他省市不特止，亦隨時殃及本港。試諗吓，如果有人將愛滋病及肺癆菌帶返香港，沙士慘劇可能重演，呢隻鑊，東莞當局肯唔肯孭先？

衞生部最新數字顯示，內地由發現首宗愛滋病個案起，二十幾年來已經有近三十萬人中招，多達八萬六千人死亡。十年前已經有學者要求正視患愛滋病等高度傳染病罪犯嘅關押問題，但當局只係推出「指導性方案」，各地幾乎乜都冇做過，直頭係靠害同胞，禍國殃民！

咪話太一叮唔提醒，惡菌兵臨城下，隨時攻破城池。港府除咗要促請內地當局喺源頭解決問題，唔好縱容罪犯播菌，更要打醒十二分精神，加強防範，千祈咪搞到「一國兩制」變咗「一國一制」，惡菌病毒一家親，中港同胞一鑊熟呀，叮！