政壇：肥龍拍賣愛駒震驚馬圈
馬圈尋日暗傳一則惹人猜疑嘅消息。有傳熱衷做馬主嘅前政務司司長「肥龍」許仕仁，突然以私人理由同馬會申請放棄馬主身份，將佢上一季購入、未出過賽嘅三歲新西蘭靚駒「各適其適」拍賣，倘若成事，佢名下再冇馬匹。
肥龍好耐冇公開現身，咁啱尋日有傳言話佢啱啱做過通波仔手術，唔知係咪身體欠佳。咁就唔知囉，馬會大董、前高官葉澍堃就話未聽過肥龍拍賣愛駒，所以佢對消息都感到驚訝。
不過，多名練馬師證實肥龍確係決定出售「各適其適」。城中唔少名人馬主都覺得情況好唔尋常，事關肥龍咁做，以後好難再以馬主身份購入馬匹，肥龍咁鍾意養馬，理應會三思而後行。