泊車黨橫行鬧市 跛腳鴨關人個關

美國有「佔領華爾街」，原來香港亦唔輸蝕，有個「佔領尖沙咀」o架。聽落相似，其實性質亦差唔多。一個抗議華府無能，另一個就利用港府無能。

嗱，尖沙咀金馬倫里有十四個咪錶位，近排畀人霸咗做「私人停車場」，提供全套代客泊車服務，有晒「時間表」，周一至周六朝九晚十二，周日朝十晚十二。

除咗招呼周到，最煞食係收費比附近停車場平咗近兩成，時租廿蚊、日租一百二十，月租都OKo架，多謝盛惠二千二百蚊。計起上嚟，泊車黨每個月至少有三萬蚊落袋，無本生利，肥過肥仔。

金馬倫里位處尖沙咀鬧市，泊車一位難求，泊車黨長期霸住政府咪錶位，直頭係和尚擔遮，無法無天。有油尖旺區議會議員話，收「月租」代客泊車聞所未聞，霸佔咪錶位對其他道路使用者不公，建議警方加強巡邏，甚至放蛇搜集資料，防止情況惡化。

唉，但凡有問題搵港府解決，例牌變咗「睇波」。呢，運輸署打完一輪官腔，就話咪錶位被霸佔並以月租形式出租，唔關佢哋事，跟手將個波踢畀警方。而警方嘅回應認真得啖笑，話一直有巡查同打擊金馬倫里嘅違例泊車，今年六至九月喺嗰一帶共發出一百二十一張定額罰款通知書喎。

叮！難為警方仲好意思吹水，四個月每月平均派大約三十張「牛肉乾」，計落每日得一張咁大把，同化公為私所得利潤根本唔成比例。咁就當交差，唔怪得泊車黨愈來愈猖狂，當正政府咪錶位係生財工具，泊車費袋袋平安，賺到盆滿缽滿咯。

查實，政府監管失職，放縱損公肥私行為，例子數不勝數，除咗對泊車黨霸咪錶位闊佬懶理，對官地私用問題更加長期隻眼開隻眼閉。早排本報曾踢爆，荃灣城門水塘引水道一帶最少有三幅官地被霸佔多時，除咗有人非法耕作並兜售私家「有機蔬菜」，仲起埋鐵皮屋，甚至擺放貨櫃，喺官地起「私人行宮」。

叮！最離譜嘅係，由於官地管理甩甩漏漏，任由奸商鑽空子，博大霧，好多地方被非法霸佔，淪為無牌骨灰龕場，甚至連風光如畫嘅佛門重地亦不能幸免，搞到烏煙瘴氣，佛都有火。

政府咪錶位成咗泊車黨提款機無王管、官地淪為私家花園冇人理，跛腳鴨政府日日等收工，乜都側側膊。計太一叮話齋，再係咁落去，禮賓府遲早畀人霸埋，成為「私家麻雀館」嘅咋，叮！