CULTUREo翕：80後農夫學會知足

香港是一個商業社會，大部分大專生畢業後，看似只會走進一條「金錢掛帥」的單程路。不過，近年環保意識抬頭，愈來愈多80後畢業後「棄商從農」，投放一、兩年時間去體驗耕種生活。浸會大學社會工作系副教授趙雨龍認為，80後當農夫，收入微薄，但就可提升個人的EQ（情緒商數）、AQ（逆境商數），還可擴闊世界觀。這次我們找來一位80後、中大工商管理學系一級榮譽畢業生Jack，分享其從農經歷。

Jack

80後青年，去年於中文大學工商管理學系一級榮譽畢業，當農夫近一年，現於粉嶺租了一幅農地，以廚餘轉化而成的有機肥料，種植各種蔬菜。

趙雨龍

浸會大學社會工作系副教授。

Jack：當初接觸到關於有機耕作嘅資訊，係因為讀大學時，參加營商比賽，揀咗將本地廚餘轉做有機肥料作為題目，於是睇咗好多關於有機耕作嘅資料，慢慢對環保及有機耕作產生興趣。大學畢業後，我就租咗塊農地，用呢啲肥料耕種。

趙：近幾年，年輕人嘅環保意識強咗好多，再加上有機耕種喺香港嚟講，係一件比較新鮮嘅事，於是愈來愈多80後畢業後投身耕作，當一、兩年農夫，體驗生活。

Jack：落手落腳種田，除咗因為想試吓自己整出嚟嘅肥料成效，亦都想趁仲有心有力嘅時候，嘗試做農夫嘅滋味。原來做農夫唔係我之前諗得咁簡單，我租塊田，一切由零開始，又要開墾塊地、除雜草，將佢由唔適宜耕種變成適合，落苗又要搵成十個朋友幫手，做咗足足兩日先完成。

趙：年輕人畢業後當農夫，收入較其他工作少得多，但係對佢哋嘅個人發展，就會有好大得着，有咗呢啲體驗，世界觀會比較闊，眼入面唔會只有商業社會，另外當感受過大自然嘅吸引力後，亦會重新反思現代社會嘅物質生活，所以對年輕人嚟講，絕對係好嘅體驗。

Jack：做農夫後，有好多得着，除知道「粒粒皆辛苦」、更加珍惜食物外，自己亦變得更獨立，日後遇到困難，相信唔會咁易放棄，會努力堅持。以前讀business嘅時候，都係學習一間公司如何透過收購合併賺錢，但經過咗呢一年嘅田園生活，我個心態唔同咗，唔使再追求做億萬富翁，只要搵到嘅錢足夠生活，就已經好滿足。另外，我發現香港農夫嘅付出，與收入唔成正比，我希望將來可以幫佢哋改善生活。

趙：香港現今社會，太強調競爭及物質生活。其實，環保同綠色生活，對社會非常重要，所以政府應該加強相關教育，等新一代知道，社會唔係只有追求物質生活嘅模式。