政壇：兜巴星下屬煲呔曾恐嚇

煲呔曾開始倒數任期，近排嘅言論同喺公開場合嘅表現真係令人側目，某啲症狀更好似人格分裂咁，譬如佢呢頭揚言從政者要謙卑，嗰頭接受報章專訪，竟然出言恐嚇要向建議改變聯匯嘅下屬「兜巴星」。尋日佢出席建築師學會嘅周年論壇時，又唔知係手騰腳震定係癡呆症發作，連人哋頒贈嘅紀念品都攞唔穩，將紀念座跌落地。煲呔曾咁嘅狀態等收工，真係要小心畀人兜巴星！

拎紀念座跌落地

煲呔曾尋日只係喺周年論壇逗留咗唔夠二十分鐘都出意外，當佢致詞完畢後，主人家送上紀念品畀佢，煲呔曾都將紀念座跌咗落地，結果台上一陣忙亂，有人負責執、煲呔曾同主人家就四手緊握手上嘅半截紀念品，唔敢鬆手，避免再生意外，現場真係夠晒尷尬。

佢出醜之後，唔夠一個鐘後出席同一活動嘅發展局局長林鄭月娥又加碼，林鄭喺活動中大講政府起動東九龍嘅計劃，結果竟然係變相「兜巴星」揚言要摑人嘅煲呔曾，因為林鄭踢爆前排公布嘅《施政報告》錯漏百出，而且錯得好「難忘」。

佢話報告將「起動九龍東」嘅英文寫錯晒，起動寫成Kick Starting，「九龍東」就寫成East Kowloon，呢一錯簡直係離晒譜，家吓政府已經將呢個計劃譯為Energizing Kowloon East。唔係林鄭矯枉過正，而係East Kowloon嘅意思可以係九龍區外嘅東部，同Kowloon East（九龍區東部）大有分別，而原本嘅英譯起動又太冇內涵喇，煲呔曾同佢嘅特首辦將份施政報告翻來覆去搞咗幾個月，竟然出啲咁嘅錯誤，你話林鄭係咪變相兜巴星佢哋呀？