劏房炸彈不拆 悲劇遲早重演

君子不立危牆之下，大家都聽過呢句說話，亦明白呢個道理，不過，明白歸明白，好多市民明知有危險，仍然焗住要立於危牆之下，講起真係無奈。嗱，劏房遍地開花，危機處處，呢啲咪就係如假包換嘅危牆囉。

今年四月，土瓜灣馬頭圍道劏房大火，奪去四條人命，慘劇歷歷在目。話口未完，前日深水埗石硤尾街一個改裝成四間劏房嘅單位又出事，今次懷疑係電錶房電線短路引起大火，由於劏房裝有假天花，火勢迅速蔓延，一時濃煙滾滾，大廈內八十名住客慌忙逃生，部分人一度被困，情況危急，場面混亂。好彩最後有驚無險，四間劏房付諸一炬，住客冇人傷亡，總算係不幸中之大幸。

今次就有驚無險啫，會唔會次次都咁好彩呢？大家都知，多數劏房環境擠迫，住客眾多，消防設施不足，萬一出事咯喎，後果可大可小o架。港府最鍾意賊過興兵，上次馬頭圍道發生劏房奪命慘劇後，劏房安全亮起紅燈，當局為咗掩人耳目，係威係勢話要加強巡查，取締違規劏房，消除安全隱患喎。點知做咗一輪大龍鳳之後，最後咪又係不了了之。嗱，咪話太一叮唔提醒吖，劏房炸彈唔拆除，悲劇遲早重演嘅咋！

查實，劏房問題多多，危機處處，正正係港府監管不力、執法不嚴嘅惡果。近年關於劏房嘅投訴愈來愈多，亂駁水喉、亂鑿牆壁、亂加門窗等等，無奇不有，唔少舊樓被拆到溶溶爛爛，甩皮甩骨，唔好話居住，睇見都牙煙啦。發展局局長林鄭月娥早前喺立法會承認，過去三年屋宇署一共收到四千四百宗關於劏房嘅投訴，但只係發出七十三份清拆令。唉，當局懶懶閒，劏房無王管，有乜法子唔亂象叢生吖！

難為有啲高官仲大大聲話，劏房未必違法，唔會一刀切取締喎。冇錯，唔係所有劏房都違法，弊在多數劏房都係環境惡劣，危機四伏，高官又敢唔敢以身作則住吓呢啲未必違規嘅劏房呢？己所不欲，勿施於人吖，講風涼話係冇用嘅，叮！

講到底，劏房之所以遍地開花，成為基層市民棲身之所，皆因港府房屋政策失敗，搞到樓價狂飆，嗰啲申請唔到公屋，又負擔唔起私樓昂貴租金嘅無殼蝸牛，除咗屈居於劏房，仲有乜嘢辦法吖。最經典係曾蔭權嗰句，「香港沒有人無瓦遮頭」。係吖，太一叮想問佢一聲，住劏房及棺材房，又算唔算有瓦遮頭呢？