政壇：四叔聞湊孫預告派利是
上海復旦大學係內地老牌大學，原來唔少復旦校董都係香港嘅商界大孖沙，好似人稱「四叔」嘅恒基地產主席李兆基、工業家蔣震、福建幫頭領楊孫西、中華總商會會長蔡冠深等，尋日復旦第五屆校董就職禮喺中環四季酒店舉行，佢哋又聚埋一齊。
過去兩個月內辭咗三十三間香港附屬公司董事職位嘅四叔，一現身就成為焦點，大家都想知道四叔呢個行動係咪為退休湊孫鋪路，不過，四叔斬釘截鐵咁話：「有限公司有成百幾間，舊到唔舊，冇用咪辭咗佢囉」。被問到啲孫仔孫女近況時，四叔即時面帶微笑話：「幾好、幾乖」，然後更預告出年農曆新年一定有利是派！
四叔同復旦大學真係幾有淵源，三年前復旦大學教育發展基金會成立嘅時候，佢就捐咗一億元。三年後復旦亦頒咗張證書畀四叔，感謝四叔慷慨解囊支持。
「四叔」李兆基講起乖孫就笑逐顏開。
蔣震（左）及蔡冠深出席上海復旦大學就職禮。