區選投票前,各式推薦名單滿天飛。尋日我哋就收到一份港島區建制派嘅神秘推薦名單,用星星記號重點支持廿四名候選人,當中唔少仲係自稱獨立嘅隱形建制派候選人;而打正旗號反對增加煙稅嘅「好煙民大聯盟」,亦開列廿一人煙民友善候選人名單,呢啲名單有幾多催票作用冇人知,但選前名單滿天飛,真係值得監管機構留意噃!
另外,泛民主派兩個主要政黨已提早告急,建制派就低調拉票免谷高投票率。