政壇:肥仔明血壓高戒自助餐

立法會議員李華明有名「肥仔明」,近年聽佢講減肥都唔係一次半次,尋日佢出席一個預防糖尿病活動時,就同美女廚神麥潔兒(Kit)一齊講吓飲食心得,肥仔明話,為咗保持身體健康,佢原來已經戒食自助餐。

肥仔明之所以戒食自助餐,無非係為咗控制體重,佢話自己好好彩冇患糖尿病,但血壓就唔多好喇,依家要靠食中藥控制,進展相當理想咁話,不過肥仔明都唔使戒晒嘅,事關已經有酒店答應研究專為糖尿病人而設嘅自助餐菜式,等為食又想健康嘅一族個個願望都可以達成。

阿Kit就鍾意食甜品,兼且鍾意落手做,佢以前都以為甜品只要落少啲糖就冇問題,原來肉類亦唔可以食太多,咁先至合健康潮流喎。

「Money18免費即秒股票報價網站」現推出8升級功能,財經資訊,實時實發!

李華明(左)同美女廚神麥潔兒,同場分享健康飲食心得。