政壇：搞搞政：葉劉落區拉票 手瘀聲沙
區選殺到埋身，個個黨都扯到盡，尤其係政壇新勢力更加肉緊。
創黨後首次參加大戰嘅新民黨都唔例外，主席葉劉淑儀雖然無參選，但就肩負幫黨候選人拉票重任，難怪要瞓晒身，尋日喺立法會見到佢，葉太一臉倦容，仲透露為咗幫各區黨友助選，搞到失聲兼撞瘀隻手，不過佢一路講傷勢，一路卻笑笑口，似乎為咗選票乜都冇計。
葉太話，呢輪忙於為黨友拉票，十分頻撲，每逢選舉季節，政治人物最常見嘅後遺症就係嗌咪沙聲，葉太都變咗豆沙喉，右手虎口位置仲瘀咗一大笪，佢解釋，前排落區助選時，唔小心撞到，無情力竟然撞到隻手瘀晒。
雖然聲沙手瘀，葉太卻話，佢睇開嘅醫生卻出咗埠，佢只好求其搵個私家醫生睇吓，跟住又忙區選，完全冇時間養傷，或者佢想選戰後慢慢抖啩。
（設計圖片及對白）