政壇:飛起徐立之金刀梁陪葬

港大校長徐立之宣布明年約滿唔續約後,各界對港大校務委員會嘅決定及事件揣測多多,呢宗象牙塔風波,後日(七日)就會擺上港大校務委員會傾,開會前夕,卻忽然傳出有校委會成員準備動議延長徐立之任期十八個月,又有校董會方面放聲,對校長任免權竟然只由校務委員會說了算大表不滿,估唔到徐立之起錨,校委會主席梁智鴻(金刀梁)唔只有排煩、仲可能被削權添!

校董會插手任免權

梁智鴻早前雖然兩度就事件解畫,仲不惜爆出上次校務委員會開會前收到徐立之信件嘅過程,但係媒體卻繼續收到唔同嘅「幕後」消息,令佢難脫施壓嘅形象。距離校務委員會開會仲有兩日,再有疑似代表港大校董會嘅消息傳出,認為依家港大校長任免程序同權限有問題。因為該校條例規定,校長任免權屬校務委員會,好似今次徐立之唔續約,聽講港大校監、港大校董會事前都唔知,所以內部有聲音要求改革,即係話,將來除咗校務委員會有權任免外,校董會都要參與話事,咁樣一係梁智鴻領導嘅校務委員會被削權,一係就被分權。

此外,聽聞有港大人亦打算喺後日嘅會議上,動議讓徐立之延任十八個月,畀校方鬆動啲時間搵人,亦回應校內有關三三四學制啱啱喺大學推行,校長就換人嘅憂慮。即係話,後日召開嘅會議對徐立之何時去留,同校務委員會角色嘅轉變有重大影響。

港大首席副校長錢大康尋日都話,校內有個別同事有向校委就事件表達意見,並強調港大會接納多元化意見,至於一旦徐離任仲未請到校長嘅署任問題,佢就以校務委員會將開會討論有關事項為由,拒作評論。

「Money18免費即秒股票報價網站」現推出8升級功能,財經資訊,實時實發!

(設計圖片及對白)