與其燒銀紙慶祝 不如加快建公屋

回歸十四年，特區政府好學唔學，反而鋪張浪費、粉飾太平嘅作風就同內地官場極速接軌。二○一三年係公屋發展六十周年，房委會計劃豪擲一千七百七十萬元慶祝，包括喺石硤尾邨舉行酒會，喺全港屋邨張燈結綵，舉行新商場同屋邨落成典禮等等。大拿拿千幾二千萬銀紙就好似燒煙花咁燒咗去，真係諗起都覺得肉赤。

記得二○○三年，港府用五百萬元慶祝公屋發展五十周年，已經被市民批評浪費。事隔十年，房委會竟然變本加厲，準備用一千七百幾萬慶祝「六十大典」，等於當年三倍有多。照咁推算落去，七十周年可能要用成六千萬元慶祝，八十周年再使兩億幾……港產官僚死要面，納稅人交多多稅都唔夠嘥啦，叮！

關注團體就講得啱嘞，家陣基層市民生活艱苦，好多人仲住緊劏房，房委會與其嘥錢大肆慶祝，不如加快興建公屋仲實際。每逢市民要求增建公屋，當局就耍手擰頭，口口聲聲「資源有限」；講到粉飾太平、為自己面上貼金，當局就一擲千金，分明係以民為笨，以官為本。

講起劏房呢家嘢，其實都幾醜怪㗎。因為公屋供不應求，香港至今仍有超過十萬人住喺環境惡劣嘅籠屋同劏房。早前有外國傳媒來港拍攝專題，直擊都市「籠民」苦況，成為國際笑話。難為煲呔曾自欺欺人，話香港嘅基層住屋問題已經解決，證據係山邊已經冇晒寮屋喎。實情係，山邊寮屋根本冇消失到，只係變咗劏房，搬上唐樓同工廈啫。

講到呢度，太一叮忽然諗到春秋戰國時嘅名臣季文子。話說季文子勤政愛民，生活儉樸，遭到同僚嘲笑，但季文子淡然回應：其實我都想將屋企布置得富麗堂皇，但係國內仲有好多人食唔飽、着唔暖，如果我為自己添置家產，點樣面對佢哋？更何況，一個官員嘅成就，應該透過實際表現評價，唔係透過衣着判斷。

同樣道理，公屋發展嘅成就，唔係靠慶祝活動吹噓，而係透過實際成果判斷。房委會應該反思一吓，佢哋豪擲公帑舉辦活動，彈冠相慶之餘，點樣面對蝸居籠屋同劏房嘅基層市民呢？

講到底，公屋發展六十周年雖然值得紀念，但冇必要大肆鋪張。嗱，關注團體有言在先，如果當局執迷不悟，唔排除到慶祝場合抗議，到時就真係攞景兼贈興啦，叮！