政壇：陳有慶遙控水災
呢幾日泰國水患愈來愈嚴重，但喺泰國經營銀行、醫院同米業等大生意嘅亞洲金融集團主席陳有慶就唔多擔心。日前下晝路過中環一間酒店，遇到佢同一名保鏢喺酒店內嘅服裝店做衫，一邊度身一邊同裁縫有講有笑，相當輕鬆，一睇就知佢係熟客。
問佢有冇受泰國水災影響？佢話日日都有留意當地嘅情況，暫時影響都唔係好大，因為唔係成個曼谷浸晒，而且嗰邊有姪仔同屋企人睇住盤生意，有乜消息都會第一時間通知佢喎。呵！原來佢遙距監察泰國嘅情況，唔怪之得咁淡定，仲有閒情逸致去做衫喇！
話口未完，佢離開咗呢間服裝店之後，又入咗隔幾個舖位嘅服裝公司繼續做衫，睇嚟心情相當好。
