政壇：梁卓偉搞政績工程 博副局政助全留低

煲呔曾喺○八年委任大批高薪副局長同政治助理，任期同佢一樣喺明年六月三十日屆滿，三年幾下來，相對表現比較好嘅原政制及內地事務局副局譚志源，同原食物及衞生局副局梁卓偉，都已先後升咗做正印局長同特首辦主任，好有機會可以留任下屆政府。

集體無厘頭落區

但其他十幾個冇乜表現嘅副局政助，表現同公眾認知度都唔合格，隨時面對失業危機。梁卓偉最近就狂派呢班舊師兄弟落區宣傳施政報告，為佢哋爭取留任大搞政績工程。

其實，煲呔曾早兩個禮拜發表咗任內最後一份施政報告，大派發霉糖，有民調結果顯示，市民一啲都唔受落，上個禮拜立法會仲否決咗對施政報告嘅致謝動議，終於衰收尾。

之不過，新任特首辦主任梁卓偉，近日係咁派班副局政助落區宣傳施政報告，而且分工同配搭非常無厘頭，例如日前運房局副局邱誠武、食衞局政助陳智遠同發展局政助張文韜，就三個人一齊落咗一個青少年論壇；保安局副局黎棟國同政助盧奕基，就分別去咗青年商會同獅子會嘅活動；政制局副局黃靜文就去咗東涌區一間學校，出席場合同佢哋負責嘅政策範疇完全無關，擺明係夾硬安排畀佢哋去博曝光。

施政報告本身已經缺乏新聞性，仲派埋啲九唔搭八嘅人去講解，傳媒自然冇興趣報道，梁卓偉惟有透過特首辦facebook群組再幫佢哋煲吓水，不過留言嘅網民都係彈多讚少，大鬧有關活動浪費公帑。

其實好多區議員都習慣喺臨選舉前，先至臨急抱佛腳大搞政績工程，無喇喇搞啲遊行示威或者落區拜訪活動，但到底佢哋平日有冇幫市民做嘢，個人質素同品行係點，市民一早心中有數。