臭氧數據爆晒燈 氣候逃犯又斷正

夕陽政府愈來愈蝦碌，正事做唔成，笑料爆不停。尤其環保呢瓣，「共建優質生活圈」變成「分享污染累鬥累」，為藍天打氣，打嘅原來係廢氣，問你服未！

醜婦終須見家翁，環保署公布上半年粵港珠三角區域空氣監測數據，真係醜怪咯。多個主要空氣污染物冇顯著改善之餘，臭氧問題更嚴重惡化，多個監測站錄得嘅每月最大時均值都嚴重超標，最嚴重嘅甚至比舊年同期急升十倍添。唔怪得環保團體狠批港府改善空氣污染冇承擔，環保政策有頭冇尾喇。

咁嘅成績單叫市民點收貨吖？係人都知，臭氧唔單止「臭」，而且「毒」，除咗刺激同損傷呼吸道，仲可能危及中樞神經系統，引致思維能力下降。藍天白雲愈叫愈走，空氣質素愈來愈差，「氣候逃犯」又再斷正，今次仲逃得去邊？

環保署例牌死撐，話臭氧值飆升同空氣污染無關，而係氣象變化引致，又話正同廣東研究珠三角地區減排安排喎。餐餐攞「氣象變化」做擋箭牌，又或者借廣東過橋，唔該搵藉口都搵新鮮啲，叮！

查實，粵港政府同床異夢，各自修行，又點可能改善空氣質素吖。呢，兩地○二年已經提出《珠江三角洲地區空氣質素管理計劃》，話十年內要大幅減少區內四種主要空氣污染物，但十年大限就快過，減排成果無一達標，其中二氧化硫排放量反而多咗近半成。因減得加，兩地政府唔知衰，前排又搞搞新意思，拉埋澳門話要就《共建優質生活圈專項規劃》展開公眾諮詢喎。

叮！講嚟講去，港府根本就吹水唔抹嘴，淨係諗縮數，最好內地改善環境，自己坐享其成，乜都唔使做。所以話，今次臭氧值勁超標，港府減排無所作為，難辭其咎。

話時話，環境局局長邱騰華減排瓣瓣唔掂，但卸膊功夫就一流。佢前排上立法會吹水，話要三管齊下減少固體廢物，仲反問議員，公眾反對擴大垃圾堆填區，引入垃圾焚化爐唔畀，源頭減廢又阻力重重，應該點樣解決？唉，身為局長冇做好自己份工，唔主動問責，反而諉過市民，簡直豈有此理！

邱騰華減廢多年一事無成，唔係搵市民埋單，就係借內地過橋，空頭支票幾乎冇一張兌現，計太一叮話齋，咁嘅官員繼續留低，只會搞到垃圾堆填區提早爆棚，叮！