政壇：九巴金公主廸士尼尋夢
「九巴金公主」伍穎梅（Winnie）係商界女強人，近年仲瞓身搞智囊工作，畀人好幹練嘅感覺，不過呢個女強人原來至今都同好多少女一樣，鍾意童話世界，每年仲要去幾次迪士尼樂園尋夢，真係講你都唔信。
不過，好多人都覺得，Winnie自從與中建企業董事許晉平拍拖之後，成個人就柔咗好多，服裝、衣飾都女人味更重。日前，佢出席一個活動時，我哋問佢有乜拍拖活動？Winnie即刻笑不攏嘴，自爆遲啲會同愛郎把臂同遊迪士尼。
呢個九巴金公主仲透露，佢好鍾意呢個童話世界，一年總會去幾次，唔好以為小朋友先會去迪士尼尋夢。
