未曾做好呢份工 否決致謝面懵懵

如果學生功課唔得，操行唔掂，科科肥佬「滿江紅」，斷估唔敢奢望得到老師嘉獎啩。

呢，曾蔭權上台以來一事無成，添煩添亂，有破壞冇建設，但年年發表施政報告，居然老奉要立法會「致謝」，你話係咪大想頭，唔衰攞嚟衰吖。

嗱，又衰咗嘞！立法會經過三日辯論後，尋日一如所料否決咗煲呔曾最後一份施政報告嘅致謝動議。呢次已經係佢在任七年第五次不獲立法會致謝，簡直瘀到痹，叮！

咁嘅結果其實一啲都唔意外。過去幾日，立法會話就話辯論致謝動議，其實就變咗幫煲呔曾治港七年埋單計數嘅「清算大會」，有議員炮轟佢「禍港七年」，犯下七大罪狀，加劇貧富懸殊、唯我獨尊、漠視民意、施政有頭無尾等等，可謂一針見血。

查實，煲呔曾衰收尾早就有迹可尋。港大民意調查發現，呢份施政報告有頭威冇尾陣，市民滿意程度「高開低收」，由最初嘅四成七，急跌到得番三成三，簡直不忍卒睹。

叮！煲呔曾施政肥佬多過合格，經濟毫無建樹，貧富懸殊日益惡化，房屋政策進退失據，民望跌到好似食咗瀉藥咁，你話嘞，佢閉門思過下「罪己詔」就差唔多，要人哋致謝，面皮仲有冇厚啲呀？

講開致謝動議呢家嘢，太一叮真係諗極都唔明，政府服務市民天經地義，使唔使年年講「多謝」吖？查實，呢樣騎呢搞作源於回歸前嘅立法局，係承襲英國傳統，議員對前港督「皇恩浩蕩」發表施政報告致謝。問題係，香港已經回歸十幾年，再唔係英國殖民地，有冇必要保留呢套虛假禮節呢？

再講吖，港人治港，市民係主人，官員係公僕，做好自己份工，為市民提供服務，係公僕職責所在。尤其係身為特區阿一，一年先至發表一次施政報告，完全係分內事，所謂致謝，唔只係多餘，簡直有違政治倫理，正如立法會議員話齋：亂倫吖！

最肉酸嘅係，回歸後立法會十五次致謝動議，十次被否決，老董及煲呔曾平分秋色，一人五次，都算係天意咯！

好心煲呔曾有啲自知之明，冇咁大個頭就唔好戴咁大頂帽啦。上台七年，香港亂足七年，咁嘅表現，要立法會致謝咪使旨意，市民多得佢唔少就真，叮！