政壇：唐唐「課外活動」打救甘威

自從疑似特首候選人唐唐爆出婚外情之後，挺唐派形容婚外情係「課外活動」、古今中外政治人物都有婚外情云云，既然建制派依家大降道德底線玩開放，當然唔可以寬己嚴人啦！據聞立法會就民主黨甘乃威涉嫌求愛不遂怒炒女助理事件嘅調查報告，原來一早就寫好，但建制派唔想泛民主派以唐唐婚外情做擋箭牌幫甘威辯護，擔心拖累唐唐選情，所以遲遲唔肯公開報告，變相救咗甘威一命。

據聞，委員會打算押後公布調查結果，仲要押後到明年三月特首選舉之後公布，為唐唐選情掃除不利因素。政壇有陰謀論話，呢個對策一石二鳥，事關明年四月公布嘅話，距離九月立法會選舉只有幾個月，甘威選情或會受損。不過，如果唐唐都冇事，對甘威嘅影響就更加微乎其微。

幾個月前問過甘威，究竟知唔知份報告幾時出爐，佢就神色好凝重話：「冇嘢講、冇嘢講！」前日再問佢，佢都係答：「冇嘢話到畀你知」，但神情就輕鬆得多，佢仲好精警咁講咗一句，話份報告幾時出，佢控制唔到，講到好似等候發落咁。而委員會主席梁劉柔芬被問到會唔會延遲公布調查結果，佢就依然封口話冇嘢交代喎。