政壇：立會投票壞掣玩殘發叔
立法會新大樓甩甩漏漏。尋日立法會投票系統首次甩轆，話說議員就民協馮檢基嘅施政報告修訂投票，當立法會主席要求議員核對表決結果時，電子螢幕顯示鄉議局主席劉皇發投贊成票，發叔隨即彈起澄清係投反對票，但撳唔到掣喎，主席惟有口頭宣布更正投票結果補鑊，認真失威。
照計發叔撳唔到個反對掣，冇理由變咗贊成o架，莫非撳錯掣？抑或嗰幾個掣都壞晒呢？秘書處真係要調查下。此外，白鴿黨涂謹申都投訴議事廳內有蚊患，莫非佢已中招？話時話，立會入伙後已發現死老鼠，記者室亦有烏蠅飛來飛去，再係咁落去，鼠輩同昆蟲仲惡過議員，認真難搞。
馮檢基已報名參選深水埗區議會麗閣選區，同區參選者有民建聯范國輝、人民力量趙植東與無黨派鍾詠淵，與涂謹申同區參選仲有自由黨劉啟傑同人民力量朱景亮。