政壇：搞搞政：張炳埋單計防選舉期票
兩名疑似特首候選人唐唐同CY梁振英近日喺各項備選活動大開期票，包括增建公屋、加強投資教育，甚至村屋僭建都話考慮放寬，佢哋係咁碌卡，將來就要庫房還錢，如果真係全部落實晒，庫房隨時乾塘都似。
行政會議成員兼教院校長張炳良尋日話，八間資助院校校長早前同CY會過面，前晚見埋唐唐，但唔肯透露兩人講乜，淨係話開期票在所難免，就算立法會候選人都係成日咁做。不過，張炳認為有意參選特首嘅人唔可以隨口噏當秘笈，建議效法外國，當候選人拋出全套政綱後，就搵啲經濟學者計清條數，整套建議究竟使幾多錢，咁成盤數出晒嚟，係假大空定係貼近現實，選民自然分得清楚，繼而決定投票畀邊個。咁即係話，預早幫各名候選人埋單計數，等各名選委同廣大市民清楚了解兌現有關期票所需要付出嘅代價。
