政壇：飛龍在天賀逸夫中心揭幕
慈善家邵逸夫捐贈一億元興建嘅城市大學邵逸夫創意媒體中心，尋日舉行一場創意無限嘅開幕式。開幕式嘅焦點係一條由名師設計、長達三十米嘅特製舞龍布幅，喺中心嘅多媒體劇院中升起，成個過程以3D投影現場轉播，邵氏基金會主席「六嬸」方逸華、城大校董會主席柯清輝、校長郭位、城大副監督梁乃鵬，仲有創意媒體中心設計師Daniel Libeskind同眾嘉賓紛戴上立體眼鏡見證呢一刻。驟眼睇，個個都好似戴上黑超，幾搞笑。
開幕式仲請來蜚聲國際嘅日本清水靖晃色士風五重奏，五名樂手喺唔同樓層露台演奏，一首首醉人樂曲響徹山頭，吸引好多人企喺路邊仰望聆聽，好有外國街頭表演嘅感覺，好正！
樂手喺露台演奏色士風，聽得人如癡如醉。
右起：郭位、方逸華、梁乃鵬、柯清輝及Daniel Libeskind，戴立體眼鏡為創意中心揭幕。