政壇：區選前狂提議案白鴿建仔鬥抽水

下個月六號就係區議會選舉投票日，立法會喺投票日前四日仲有個大會，建仔已經喺大會提出咗兩個關於民生嘅動議議案，好明顯係希望盡地一鋪，而幾個白鴿黨議員對動議議案提出修正議案，擺明係鬥抽水，增加曝光機會，喺投票日前最後衝刺。

肉酸！五鴿圍啄兩動議

唔少立法會議員都有參加區選，包括出選沙田田心區嘅建仔副主席劉江華同出選屯門樂翠區嘅白鴿黨主席「鐵頭仁」何俊仁咁，梗係唔會放過立法會呢個平台拉票啦。好似劉江華咁，喺區議會選舉前嘅立法會大會就提出一個關於「減輕中產人士經濟負擔」嘅動議，話提議政府增加免稅額、減差餉、補貼電費喎，而冇參選嘅建仔主席譚耀宗都有提出動議，話要全面改革強積金咁話，好明顯係亮下相幫手拉票啦。

正所謂「你精人哋唔笨」，有水抽咪一齊抽囉。白鴿黨包括鐵頭仁在內有五個議員參加區選，其中四隻白鴿對劉江華嘅動議提出修正案，而另一隻鴿亦向譚耀宗嘅動議提咗修正案。本來呢啲黨派狙擊都見慣晒o架喇，通常有乜嘢修正每個黨派一個人講咪得囉，但係區議會選舉前夕，個個都想曝下光，結果兩個動議白鴿黨竟然有五個人出嚟提出修正案，即係務求個個都有得講幾句，但就真係有啲肉酸嘞！

不過，又難怪嘅，今次區議會選舉好多人都話冇乜選舉氣氛，候選人都冇乜機會曝光，既然立法會有位攝咯，梗係唔好嘥喇！

喺嚟緊嘅區選，同劉江華同區參選嘅有孫燦培，而同鐵頭仁同區參選嘅就有沈錦添同人民力量陳偉業。