施政得把嘴 致謝純吹水

煲呔曾最後一份施政報告民意評價高開低收，開頭唔算太肉酸，都叫做有少少睇頭o架，點知跟住就好似食咗瀉藥咁，市民滿意度一日不如一日，跌勢仲勁過舊年添。風水佬呃你十年八年，煲呔曾施政吹水唔抹嘴，話咁快就原形畢露。

呢，又到例行公事嘅時候。立法會尋日起一連三日辯論施政報告致謝動議，可惜，致謝嘅聲音就聽唔到嘞，炮轟嘅聲音就此起彼伏，連建制派亦乘機抽水轟埋一份，搞到成個批鬥大會咁，諗起都好笑。聽吓議員點講吖喇，有人為煲呔曾埋單計數，力數佢禍港七年多宗罪；有人翻舊帳，批評佢喺生果金同慳電膽事件中唔聽民意，自取其辱；有人繼續插佢委任林公公做政務司司長，搞政治亂倫；有人就炮轟新居屋姍姍來遲，而且搞分化；有人仲抵死，指夕陽政府絕非無限好，而係後知後覺兼不知不覺。

嗱，呢啲就叫做人言可畏嘞。議事堂上炮聲隆隆，煲呔曾淪為千夫所指，簡直衰到貼地。唔使問阿貴，今次致謝動議又係過唔到關居多，即係話，煲呔曾七份施政報告有五份不獲致謝，你話係咪醜怪吖。

群眾眼睛係雪亮嘅，立法會議員唔收貨，完全係意料中事。呢份所謂「繼往開來」嘅施政報告，表面上包羅萬有，由房屋到安老政策，由民生到經濟發展，甚至連僱員侍產假同市民領養流浪貓狗都提到。但實際上又係煲無米粥，好簡單，夕陽政府時日無多，就算講得出都做唔到喇，到頭來咪又係將所有問題留畀下屆政府，叮！

就以所謂新居屋嚟講，最快都要五、六年後先至落成，等得嚟蛇都死喇，加上煲呔曾阿茂整餅，搞咗個雙重資助引起爭議，為下屆政府留低蘇州屎，日後都唔知點收科。而講到扶貧咯喎，亦係得啖笑，施政報告例行公事，係咁意向基層市民同老人家派幾粒糖，小恩小惠，聊勝於無，最慘係嗰啲「N無人士」又係得個睇字；至於中產階層，成份施政報告更加隻字不提添。

不患寡而患不均吖，唔通煲呔曾到咗今時今日仲未明白呢個道理？唉，人哋就話錢多好辦事，港府庫房水浸，居然連點樣派錢都唔識，簡直係孺子不可教也！

所以話，人蠢無藥醫，官蠢扶唔起，如果煲呔曾係醒啲嘅，就唔會上台七年一事無成喇。計太一叮話齋，立法會與其年年搞埋啲無無聊聊嘅所謂致謝動議，不如搞搞新意思，改為致歉動議，咁咪仲實際，叮！