連鎖鞋店Le Saunda行政總裁Alice劉舜慧前日現身公司業績發布會時，將自己打扮到好似個男仔咁，黑色中袖企領西裝褸襯窄腳褲，腳踩自家新品牌Linea Rosa最新時款「Kate系列」意大利牛漆皮平底鞋，顛覆晒一般高級行政人員嘅裝扮，型爆！
Alice話呢對新鞋啱啱喺內地推出咗十日，香港仲未有得賣，售價約二千蚊。新系列嘅特色係玩金屬設計，鞋頭同鞋踭都包住金色金屬，加上閃令令嘅漆皮鞋面，型格十足，佢梗要先試為快，仲爆料話丁子高都有一對添！
身材玲瓏嬌小嘅劉舜慧潮着男裝，並演繹自家品牌嘅靚鞋。
