政壇：搞搞政：張建宗冷待全民退保

煲呔曾喺施政報告話社會對全民退休保障仲未有共識，現時呢個階段唔會啟動，但勢估唔到佢下屬勞工及福利局局長張建宗，真係諗住乜嘢都唔做。

立法會福利事務委員會轄下嘅退休保障事宜小組委員會將喺下禮拜一開會，都係想畀政府聽吓學者同關注團體對全民退休嘅意見，而且上去畀意見嘅人都唔係泛泛之輩，好似港大統計及精算學系名譽副教授吳佛光博士、公共專業聯盟研究總監陳啟明咁，個個喺福利研究方面都有一定心得。

點知政府hea到爆兼賤待呢個會議，局長張建宗竟拒親自出席唔在講，就連常任秘書長同副秘書長都唔肯派番個，淨係派個首席助理秘書長列席。

張建宗匿埋，固然對班議員同其他與會者有欠尊重，若果班學者同議員到時有嘢想問番政府，啲低級官員肯定答唔到，最終又要返去轉達上司，費時失事。今時今日夕陽政府效率咁低，唔係冇得解釋o架。