政壇:蔡堅鼻旁針灸條條fing
香港醫學會會長蔡堅尋日出席聯席香港醫療水平關注組記者會時,見佢鼻旁兩邊插住針灸用嘅幼針,郁起嚟真係條條fing,認真搞笑,後來至知佢做緊針灸。原來佢上禮拜到內地交流後冷傷風返港,擔心食西藥會眼瞓,於是用針灸拮入鼻旁兩邊,既通鼻塞、止鼻水,又唔會瞓。
蔡堅話十年前學過針灸技術,連證書都攞埋,又話中國針灸已被西方接受,西方更發展出自己一套針灸方法,而佢學嗰套針灸方法係外國嗰套,其實同中國針灸方法差唔多,只係拮針位置用一個號碼代替中國針灸嘅穴位。唔怪得問佢拮邊個穴位,佢都講唔出啦,但估計應該係「迎香穴」。
蔡堅鼻旁兩邊插住針灸用嘅幼針,幫助傷風通鼻塞同止鼻水。