政壇：雙英選戰預埋鐵頭仁

下屆特首選舉嘅新聞日日新鮮，三名疑似特首候選人唐唐、CY梁振英同白鴿黨主席「鐵頭仁」何俊仁，尋日首度前後腳出席「ICT動力與特首備選人會面」，唐唐會見傳媒時先後三次澄清自己正在考慮當中，有次仲手指指話「後面個title係錯嘅」，嚴肅聲明自己並唔係「備選」。

唐唐避談23條立法

唐唐澄清「備選」呢兩個字火力十足，但當被問及《基本法》第二十三條立法時，就僅稱二十三條立法係一個嚴肅同大問題，任何有意參選特首嘅人士都必須要答呢個問題，所以倘若佢決定參選時亦會交代。

至於外傭居港權官司應否提請人大釋法，唐唐認為外傭有居港權唔符合佢哋來港嘅原意，所以希望輸咗官司嘅政府盡快上訴至終審法院。至於CY，佢冇表態係咪支持釋法，僅稱要慎重評估釋法同唔釋法嘅影響，佢會睇過判詞後至作評論。

早就表態有意參選嘅鐵頭仁一直畀人當透明，今次有份獲邀出席會面別具意義，難怪佢即時擺出一副戰鬥格，而且句句有骨咁話呢個係首個平等對待佢嘅團體。