政壇：劉吳抗癌半年現身馬場

商務及經濟發展局前局長Rita劉吳惠蘭，自從四月傳聞因患上結腸癌而宣布辭職後，一直未有露面，只係喺前資訊科技總監葛輝踢爆上網學習支援計劃招標醜聞擾攘期間，發過一封信澄清自己冇參與其中，睇嚟應該係接受緊治療同喺屋企安心養病。經過逾半年時間深居簡出，近日佢終於復出嘞！

面容憔悴 身形冇變

啱啱過去嘅禮拜日喺跑馬地馬場發現Rita同老公劉志強入場，原來佢哋係為有份嘅政務官團體馬「勝任有餘」打氣。當日Rita一身休閒打扮，戴住一副深啡色太陽眼鏡，再配上一件啡色花紋長袖衫同淺色長褲，翹住老公一齊步入馬場，期間非常低調。

記者起初仲以為眼花認錯人，但睇真啲原來真係佢喎，於是等佢哋離開時上前打個招呼，問候吓Rita嘅近況，點知佢扭扭擰擰唔肯講，仲好緊張咁匿喺老公背後添，十足當日前廣播處長朱培慶匿喺艷女Coco後面咁。

據聞Rita本月底就會完成化療程序，治療過程相當順利，佢近日亦開始約老友出嚟食飯見吓面，講吓自己嘅近況。雖然佢康復情況理想，但見佢面容憔悴咗好多，不過身形就同辭職前差唔多。當日醫管局主席胡定旭入場為愛駒「心路」出賽打氣，Rita一見到肥胡，就主動上前打招呼添！