忽然保育惹爭拗 頭痛醫頭添煩亂

潮流興保育，環境要保育，自然要保育，古蹟更加要保育，大勢所趨，港府亦扮到忽然保育咁嘅款。呢嗱，當局最新搞作就係將何東花園列為法定古蹟，禁止業主拆之哉。

本來呢，遲到好過冇到，本港具有特色或歷史意義嘅建築物拆一間少一間，港府保育文物不力備受抨擊，就好似景賢里咁，畀人拆到爛溶溶先至補鑊，乜都遲喇。依家當局終於肯正視問題，主動保護古蹟，點都好過翹埋雙手乜都唔做，所以咯喎，將何東花園列為法定古蹟，好多人舉腳贊成o架。不過咁，好多人贊成唔表示冇爭議，關鍵係業主贊唔贊成呢？好可惜，業主似乎唔係好滿意噃。

講起何東花園就巴閉咯，呢間位於山頂道嘅建築物已有八十幾年歷史，係本港現存歷史最悠久嘅中國文藝復興建築，確實好有保留價值o架。今年一月發展局將大宅列為暫定古蹟，準備用一年時間同業主磋商保育方案，可惜遲遲未能達成共識，為咗避免重蹈景賢里覆轍，當局先下手為強，將大宅正式列為法定古蹟，咁就邊個都唔郁得咯。

話時話，先下手為強無疑係高招，但咁樣算唔算霸王硬上弓呢？又算唔算侵犯私產呢？唔怪得業主頗有微言喇。其實，業主有微言都好正常啫，何東花園位處山頂，地皮罕有，估計價值幾十億元，港府計劃以換地方式將附近一幅限制多多嘅地皮交換，兩者價值可能差天共地，業主唔接受又有乜出奇吖。

所以話，港府搞保育畀人嘅感覺就係添煩添亂，成事不足，敗事有餘。景賢里事件之後，當局一口氣將一千四百幾幢建築列為古蹟，搞到一眾業主無所適從，直斥當局侵奪私產。仲有吖，去年大浪西灣事件引起滿城風雨，當局為咗補鑊，又係一次過將五十四幅鄰近郊野公園嘅私人土地納入規劃管制，新界居民怒斥當局嘅做法等同搶奪民產，夕陽政府比殖民政府仲差。唉，呢個政府做乜都係頭痛醫頭，腳痛醫腳，有乜法子唔撞板吖！

嗱，咪話太一叮唔提醒，保育唔可以靠三分鐘熱度，更加唔可以急就章，心血來潮亂搞一通，最緊要制訂一套完整及長遠嘅保育政策，做到有法可依，有例可循。呢，有人早就提議設立保育基金，集合政府及民間嘅力量，對受到保育影響嘅建築物或土地作出合理賠償，咁咪唔使次次都搞到爭論不休，怨聲四起咯。當局自己冇計，又唔肯聽人意見，你話係咪搵嚟搞吖，叮！